குறுஞ்சாமிகளின் கதைகள்-4

 முத்தையன்


ஒரு காலத்துல அகப்ப நாட்டுல பஞ்சம் வந்ததால் ஊருசனம் பூராவும் பொழப்புக்காக வேற ஊருகளுக்கு போனாக அந்த ஊருல இருந்த மாடப்ப தேவரும் அவரு பொன்னாட்டி மாடியும்தெக்க இருந்த அம்பசமுத்திரத்துக்கு பக்கத்துல இருந்த ஊய்க்காடுங்குற ஊருக்கு வந்தாக மாடப்பத் தேவரு ஆளு கட்டு முட்டாவும் கடா மீசையுமா இருந்ததால ஜமீன்தாரு அவர ஊர் காவலுக்கு வைத்தார்.

அந்த ஊருக்கு வந்த ராசியோ என்னமோ ரொம்ப காலமா புள்ளையே இல்லாம இருந்த மாடி கர்ப்பமானா அச்சு அசலா அப்படியே மாடப்பத் தேவரையே உரிச்ச மாதிரி ஒரு ஆம்பளப் புள்ளைய பெத்தா.புள்ளையப் பூப்போல பொத்திப் பொத்தி வளர்த்து முத்தையான்னு பேரு வைச்சா புள்ளையும் வளர்ந்தான் வீர சூரனான எளவட்டமானான் எளவட்டம் முத்தையாவும் அப்பாவோட காவலுக்குப்போக ஆரமித்தானெளவட்டத்துக்குன்னே இருக்கின்ற விசயம் என்ன?காதல் தானே முத்தையாவும் அந்த ஊர்ல இருந்த வீராயியும் காதலிச்சாக ரெண்டு பேரும் ஊர் ஒடுங்குண பிறவு ஊருக்கு ஒதுக்கு புறமாக ஒரு மரத்தடியில அடிக்கடி சந்தித்து பேசிப் பிறக்கி இருந்தாக.களவே இல்லாம இருந்த ஊர்ல திடீர்னு வாழத் தோப்புல வாழத்தாருக களவு போக ஆரபிச்சிச்சு இந்த சேதிஜமீன் தாரு காது வரைக்கும் போக அவரு மாடப்பத் தேவரக் கூப்பிட்டு உம்ம காவல் காட்டுல எவனோ ஒரு கொம்பன் கை வரிசக் காட்டு தானே நீரு என்ன பண்றீருன்னு கோவமா கேட்டுட்டாரு.

மாடப்பத் தேவருக்கு மனசே சங்கடமாயிருச்சி அந்த கள்ளாளிப் பெயல எப்படியாவது பிடிச்சிருதேன் எனக்கு நாலு அரண்மன வீரங்களக் கொடுங்கன்னு தயவா கேட்டாரு ஜமீன்தாரும் ஆளு அனுப்பினாரு.
முத்தையாவும் வீராயியும் எப்பவும் சந்திக்குற எடத்துல பொழுது கருகருன்னு மசங்குன நேரத்துல கூடுனாங்க அப்ப அவ எனக்கு ஊடு பழம் சாப்பிடணுன்னு ரொம்ப ஆசையா இருக்கு நாளைக்கு கருக்கல்ல என்ன பாக்க வரும் போது கொண்டுக்கிட்டு வருவீர்களான்னு கேட்டா நீ கேட்டா மலையையே தூக்கிட்டு வருவேன் ஊடுபழம் பெருசா!ன்னு வீரமாச் சொன்னான்.

முத்தையா காவல்க்காரனோட புள்ளைங்கரதால எந்தத் தோட்டத்துக்கும் எப்ப வேணாலும் போயிட்டு வருவான் எந்தெந்தப் பனையில நொங்கு கிடக்கு எந்தெந்தத் தென்னையில எளநி கெடக்குன்னு எல்லாமே அவக்கு அத்துப்படி வீராயி ஊடு பழன்னு சொன்ன நிமிஷத்துல கல்லுடையான் தோட்டத்துல எட்டாவது பத்தியில பன்னிரண்டாவது வரிசையில் இருக்கின்ற வாழத்தாருல இருக்குங்குறது அவன் ஞாபகத்துக்கு வந்துச்சு உடனே மனசுக்குள்ளயே திட்டம் போட்டான்.இன்னிக்கு ராத்திரிக்கு கல்லுடையான் தோட்டத்து ஊடு பழ வாழத்தார வெட்டிட்டி வந்து ஒடப் பொதர்ல ஒளிச்சு வச்சிரணும்னு முடிவு பண்ணினான்.

அன்னிக்கு ஜமீன்தாரு மாடப்பத் தேவரக் கூப்பிட்டு இன்னிக்கு ராத்திரி அந்தக் கள்ளாளிப் பயல உம்ம கையில மாட்டினா மொதல்ல அவன் மொகத்த ஒரு குட்டிச் சாக்கு(கோணிப்பை)மூடுக் கட்டிரு பொறவு அவனை ஊருக்கு கிழக்கே இருக்குற வெட்டுப் பாறைக்கு கொண்டு போய் தலைய துண்டா வெட்டிரும் ரவோட ராவா அவன் பொணத்த நாய் நரி திங்கட்டும் இத செஞ்ச உனக்கு ஒரு பெரிய சன்மானம் இருக்குன்னு சொல்லி அனுப்பி வைச்சாரு.

முத்தையாவுக்கோ தூக்கமே வரல எப்படா ரெண்டாஞ்சாமம் வரும்னு கணக்கு பண்ணிக்கிட்டே இருந்தான் ரெண்டாஞ்சாமம் வந்ததும் எந்திரிச்சி எரவாணத்துல சொருகியிருந்த வெட்டருவாளை எடுத்துகிட்டு தோட்டத்துக்குப் போனான்
வாழத் தோட்டத்தைச் சுத்தி ஆளு உசரத்து உயிர்வேலி தோட்டத்து ஈசான மூலையில் மட்டும் போக வர ஒத்த வழிப்பாதை.
நல்ல கும்மிருட்டு அந்த இருட்டுலயும் ஒருத்தன் வாசத் தட்டியத் தொறந்துட்டு கொஞ்சங்கூட பதட்டமே இல்லாம போறத மாடப்பத் தேவரும் கூட இருந்த இரண்டு வீரங்க இரண்டு பேரும் பாத்துட்டாங்க அந்த விரங்கிட்ட மாடப்பத்தேவரு புள்ளிக்காரன் வசமா வந்து கண்ணியில மாட்டிகிட்டான் குட்டிச்சாக்கையும் கயித்தையும் எடுத்துத் தயாரா வச்சிக்கிட்டு மெள்ள பூன மாதிரி நடந்து வாங்க புள்ளிக்காரன் வாழத்தாரு வெட்டிட்டு இந்த வழியாத்தான் வருவான்னு மெதுவாச் சொல்ல ரெண்டு பேரும் சரின்னு தலையை ஆட்டினாங்க.
அந்த மையிருட்டுலையும் முத்தையா ஊடு பழத்தை கண்டுபிடிச்சி அழுக்கிப் பாத்து அது ஊடு பழந்தான்னு சரியா பூகிச்சி அருவாள ஒங்கி வாழத்தாரு தண்டுல ஒரு வெட்டு வெட்டினான் அவன்வெட்டுன சத்தத்தைக் மாடப்பத் தேவரும் வீரங்களும் உசாரானாங்க..

வாழத்தாரு ஒராளு சொமை இருந்துச்சு ஆனா முத்தையா வாழத்தார அனாயசமா ஒரு கையால தூக்கித் தோள் மேல போட்டுக்கிட்டு வந்தான் இவுக திட்டம் போட்டப்படியே சாக்குபையை அவன் மேலப் போட்டுக் கவுத்திட்டாக முத்தையாவால சத்தம்கூட போட முடியல முத்தையாவ குண்டுக்கட்டாக கெட்டி அப்பிடியே வெட்டுப் பாறைக்கு கொண்டு போயிட்டாங்க.
அங்க போனதும் விரங்க மாடப்ப தேவர்கிட்ட உங்கள ஜமீன்தாரு இந்தக் கள்ளாளிப் பயலோட தலைய வெட்டச் சொன்னாரேன்னு சொன்னாங்க உடனே இவரும் வெகுமதிக்கு ஆசப்பட்டு ஒரே வெட்டா வெட்டிடார் முத்தையாவோட தலை அப்படியே சுத்திப்போய் தனியா விழுந்திருச்சி பொறவு மாடப்பத் தேவரு ரொம்ப பெருமிதத்தோட வீட்டுக்கு போயிட்டாரு மறுநா விடிஞ்சானதான் தான் வெட்டினது தன்னோட புள்ளைங்கிற உண்மையே தெரிஞ்சுது தான் தவமா தவமிருந்து பெத்த புள்ளையோட ஒடம்ப நாய் நரி திங்கறதப் பார்த்த மாடி புருசன மனசு ஆறுற வரைக்கும் திட்டினா மனசு ஆறுமா?துக்கம் தாங்காம பாழங்கெணத்துல செத்து மடிஞ்சா பெத்த புள்ளையையே கொன்னுட்டோமே இனி உயிரோட இருக்கலாமான்னு நெனச்சு மாடப்பத் தேவரும் புளிய மரத்துல தூக்கு போட்டு நாண்டுகிட்டாரு.

ஒரு குடும்பமே அழிஞ்சு போக நாமதான் காரணம் னு வீராயியும் அரளி வெதையை அரச்சுக் குடிச்சிட்டு செத்துப்போனா
ஒரு வம்சமே அழிஞ்சு போக தாணும் ஒரு காரணம்னு நனச்சு மகராசா ஊய்க்காட்டு மாடன் கோயில ஒட்டி ஊய்க்காட்டு முத்தையாவோட சிதைஞ்ச சடலத்தையும் வெட்டுப்பட்ட தலையையும் அடக்கம் பண்ணி அந்த இடத்துல ஒரு பூடத்தையும் கெட்டி வச்சார்ன்னு ஊய்க்காட்டு முத்தையாசாமியோட வரலாறச் சொன்னாரு செம்புலிப் பட்டணம் தங்கராசு

குறுஞ்சாமிகளின் கதைகள்-3

பொம்மக்கா திம்மக்கா -கிராமத்து சாமி


மேற்குத் தொடர்ச்சி மலையில் கேரள நாட்டு எல்லை மலை உச்சியில இருக்கு பானம் தீர்த்தம்ங்கிற அருவி அந்த அருவில குளிச்சிட்டு அடுத்த் மலையடி வாரத்துல இருக்கிற அகத்தியர் அருவியில குளிக்கறத்துக்காக மலங்காட்டு வழியா நடந்து வந்துகிட்டு இருந்தான் ஒரு எளவட்டம்.

அவன் பேரு முத்துப்பட்டன் மேல் பட்டறையச் சேர்ந்தவனா இருந்தாலும் வீரத்திலும் தீரத்திலும் பெரிய ஆளு
அந்த எளவட்டம் நடந்து வர வழியில ஆத்துக்குள்ள குளிச்சிட்டிருந்த பொம்மக்கா திம்மாங்கிற அழகான பொண்ணுங்களைப் பார்த்தான் அந்தப் பொண்ணுங்களைப் பார்த்ததும் அவங்க மேல தீராத மோகம் வந்துடுச்சி அவங்க ரெண்டு பேரும் காட்டுல மாடு மேய்க்கிற அவங்கப்பா வாலப்பனுக்கு கஞ்சி கொண்டு வந்து கொடுத்துட்டுப்போகிற வழியில் குளிச்சிட்டிருந்தாக.
அத்துவானக் காட்டுல அந்தப் பொண்ணுங்களப் பார்த்து மோகம் கொண்ட முத்துப்பட்டன் அவங்க பின்னாலே போனான்
முத்துப்பட்டன் உங்க ரெண்டு பேருல ஒருத்திய நான் கல்யாணம் செஞ்சிக்கிடணும்ணு நினைக்கேன்னு வெளிப்படையாச் சொன்னான்.

அப்பெண்கள் இந்த கல்யாணம் காட்சி பத்தி எல்லாம் எங்கப்பாக்கிட்டத்தான் பேசிக்கிடணும்ணு சொல்லிட்டு போயிட்டாங்க
தலைமறைவா அந்தப் பொண்ணுங்கல தொடர்ந்து போன முத்துப்பட்டன் வாலப்பன் மாடுக மேய்க்குற எடத்தை தெரிஞ்சிக்கிட்டான்.
அப்பாவுக்குக் கஞ்சி கொடுத்துக்கிட்டு அந்தப் பொண்ணுங்க போன பொறகு முத்துபட்டன் வாலப்பன் பக்கத்துல போய் கும்பிட்டு காட்டு வழியாப் போகும்போது உங்க பொண்ணுங்கல பார்த்தேன் அவங்கள்ல ஒரு பெண்ணை எனக்குக் கல்யாணம் செஞ்சிதாங்கன்னு கேட்டான்.

வாலப்பனும் பதிலுக்கு முத்துப்பட்டனைக் கும்பிட்டு உங்களைப் பார்த்தா உயர்ந்த சாதிப்பிள்ளையாத் தெரியுது நாங்க கீழ் சாதிக்காரங்க உங்களுக்கும் எங்களுக்கும் ஏணி வச்சாலும் எட்டாது அதனால உங்க முடிவை மாத்திக்கங்கன்னு பணிவாச் சொன்னான்.
உடனே முத்துப்பட்டன் ஐயா குலம் கோத்திரம் பத்தியெல்லாம் பேசாதீங்க நா உங்க மகள்களப்பாத்தவுடனேயே அவங்கட்ட என் மனச பறிகொடுத்துட்டேன் இனி வாழந்த உங்க மகள்களோட வாழ்வேன் இல்லைனா இந்தக் காட்டுலையே செத்துப்போயிருவேன்னு சொன்னான்.

முத்துப்பட்டனோட மன உறுதியைப் பார்த்து மனசு மாறின வாலப்பன் சரி நீர் என் விட்டில் ஒரு மாசமாவது தங்கி இங்கு நான் பாக்குற வேலையை எல்லாம் பாக்கணும் எங்கல போல சாக்கை(கோணிப்பை)விரிச்சிப் படுத்து ஒறங்கணும் எங்களப் போல உடை உடுத்தணும் நாங்க சாப்பிடும் சோறைத்தான் சாப்பிடணும் சம்மதிச்சா நான் உமக்கு பொண் தரச் சம்மதிக்கிறேன்னார்.
முத்துப்பட்டன் வாலப்பன் சொன்னத்துக்கெல்லாம் சம்மதிச்சான்
காதலுக்காக முத்துப்பட்டன் மாடு மேய்ச்சி சாக்குல படுத்து தூங்கி அவங்க குடிக்கும் கஞ்சி குடிச்சி ஒரு மாசம் அவங்களோட வாழ்க்கையை வாழ்ந்தான்.

முத்துப்பட்டனோட கடின உழைப்பு மன உறுதி ஒழுக்கம் எல்லாத்தையும் பார்த்து ரொம்ப திருப்தியான வாலப்பன் தம் பொண்ணுங்கல ஒருத்தியை முத்துப்பட்டனுக்கு கட்டிக் கொடுக்க நினைச்சான் ஆனா பொண்ணுங்க ரெண்டு பேருமே முத்துப்பட்டனை கட்டிக்க நெனைச்சாங்க.
அந்த முடிவ அப்பங்காரங்கிட்டவும் முத்துப்பட்டனிடமும் சொன்னாங்க அதுக்கு முத்துப்பட்டன் சம்மதிச்சதால அந்த பொண்ணுங்க ரெண்டு பேரையும் முத்துப்பட்டனுக்கு வாலப்பன் மொறைப்படி ஒரு கோயிலுல வைச்சிக் கல்யாணம் செஞ்சி கொடுத்தான்.

கொஞ்ச காலம் பொம்மாவோடேயும் திம்மாவொடையும் ரொம்ப சந்தோஷமா குடும்பம் நடத்தினான் முத்துப்பட்டன் ஒருநா காலையில வழக்கம் போல மாடுகள பத்திக்கிட்டு மலக்காட்டுக்கு மாடு மேய்க்க போனான் மாடுகளோட காவலுக்கு ரெண்டு நாய்களும் போகும் அதுகளுக்கு பூச்சி காச்சின்னு பேரு சாயங்கால நேரத்துல முத்துப்பட்டன் புல்லாங்குழல் எடுத்து வாசிப்பான் புல்லாங்குழலோட இசை கேட்டதும் மாடுகளெல்லாம் ஒரு எடத்துல கூடும் வழக்கம் போல அன்னைக்கும் மாடுகளப் பத்திக்கிட்டு விட்டுக்கு வரும்போது மாடுகள கொள்ளையடிச்சிட்டு போற கொள்ளைக்காரங்க கையில அருவா கத்தி ஈட்டியோட மாட்டு மந்தைய மறிச்சாங்க.
கையில வேல்கம்பு வச்சிருந்த முத்துப்பட்டன் அந்தக் கொள்ளைக்காரங்கிட்ட சண்டை போட்டு அத்தணை பேரையும் குத்திக் கொன்னுட்டான்.

சண்டபோட்ட களப்புதீர ஆத்துல எறங்கி தண்ணி குடிக்கும்போது தப்பி வந்த கொள்ளைக்காரங்கள்ல ஒருத்தன் பக்கத்துல கிடந்த குத்தீட்டிய எடுத்து முத்துப்பட்டனை குத்திட்டான்.
ஈட்டி குத்தி கிழிச்சிருச்சி எல்லாகொடலும் வெளிய வந்திருச்சி இருந்தாலும் சுதாரிச்சிகிட்டு முத்துப்பட்டன் தன் தலையில கட்டியிருந்த துண்டை அவுத்து வெளியே வந்த கொடலை வயித்து குள்ள தள்ளி துண்டை வைச்சி இடுப்ப கட்டிகிட்டு தன் வயித்துல குத்துயிருக்கிற ஈட்டியை உருவி எடுத்து குத்தியுருமா கொலையுருமா கிடக்கிற அந்தக் கொள்ளைகார பாவி மேல விசீனான் குத்தீட்டி குறி தவறாம பட்டதால கொள்ளையன் அந்த எடத்துலையே உயிரை விட்டான் உடல விட்டு கொடல் வெளியே வந்துட்டதால முத்துப்பட்டனும் ஆத்தங்கரையிலே செத்து விழுந்தான்.
முத்துபட்டன் செத்ததும் காவலுக்கு நின்ன காச்சி நாயும் பூச்சி நாயும் நேர வாலப்பன் வீட்டுக்கு போயி பொம்மக்கா திம்மக்காவோட சேலையை கடிச்சி இழுத்துச்சிபயந்து போன பொம்மக்காவு திம்மக்காவும் நாய்க பின்னாலேயே போனாங்க அன்னக்கிப் பார்த்து வாலப்பனும் இல்ல.

ஆத்தங்கரைக்கு போயி பாத்த பெறகு தான் என்ன நடந்திருக்கு ஏது நடந்திருக்கும்கிற விசயம் அவங்க ரெண்டு பேருக்கும் தெரிஞ்சுது முத்துப்பட்டன் மேல விழுந்து பொம்மக்காவும் திம்மக்காவும் அழுதாக
ரெண்டு பேரும் தன் புருசோனட பிணத்துக்கு கொள்ளி வச்சாங்க எரிகிற அந்த நெருப்புகுள்ள பாஞ்சி தன் புருசனோடவே சேர்ந்து எரிஞ்சாங்க அதை பார்த்த காச்சி நாயும் பூச்சி நாயும் எரிகிற நெருப்புகுள்ள பாய்ஞ்சி உயிரை விட்டிருச்சிங்க
இப்படி முத்துப்பட்டனோட சேர்ந்து பொம்மக்காவும் திம்மக்காவும் காச்சி நாயும் புச்சி நாயும் சாமியாயிட்டாங்கன்னு ரெண்டு சகோதரிகளோட கதையைச் சொல்லி முடிச்சாரு ஆழ்வார் குறிச்சியைச் சேர்ந்த முத்துக்குமார்.

குறுஞ்சாமிகளின் கதைகள்- 2

 சுடலையும் மந்திரவாதியும்


கொட்டாரக் கலையில இருக்கிற பகவதியம்மன் கோயில் ஈசான மூலையில ஒரு கிடாரம் நிறைய பொன் இருந்திச்சு அதைப் பாதுகாக்கிற பொறுப்பை பகவதி அம்மாள் சுடலைட்ட ஒப்படைச்சி இருந்தா.
மலையாளக்கரை ஒரமா காளிப்புலையன்னு ஒரு சூப்பர் மந்திரவாதி இருந்தான் அவன் சாமிகளின் கண்ணையே கட்டக்கூடியவன்.
ஒருநாள் அவன் எந்தெந்த இடங்கள்ல புதையல் இருக்குன்னு மை போட்டு பார்க்கும்போது பகவதியம்மன் கோயிலுக்குள்ள ஒரு கிடாரம் பொன் இருக்குங்கிற விவரம் அவனுக்கு தெரிஞ்சிச்சி உடனே நேரா பகவதி அம்மன் கோயிலுக்குப் போனான் சுடலை வெளியேறுகிற நேரம் பார்த்து கிடாரத்தைக் கைப்பத்தணும்னு நினைச்சுக் காத்திக்கிட்டிருந்தான் காளியப்புலையன்.
அன்னிக்கு வெள்ளிக்கிழமை நடுச்சாமம் போல சுடலை சுடுக்காட்டுக்கு வேட்டைக்கு புறப்பட்டார் உடனே காளிப்புலையன் நேரஏ பகவதி அம்மன் கிட்டப் போயி அவளை செயல் படவிடாம ஆரக்கட்டிட்டான் பிறகு கிடாரம் உள்ள இடத்துக்கு வந்து கிடாரத்தை தோண்டி எடுத்து ஒரு மந்திரக் காளை முதுகுல பொன்னப் பொதியாக போட்டு ஏத்திக்கிட்டு தன் இருப்பிடத்திற்கு போனான்.
வேட்டைக்குப் போயிட்டு வந்த சுடலை கிடாரத்தை பார்த்தார் ஒரு கிடாரம் பொன்னக் காணலை பகவதியம்மையிடம் போய் எப்படி கிடாரம் காணாம போச்சின்னு கோட்டார்.
பகவதி அம்மை நடந்ததையெல்லாம் சொல்லி அதை மீட்டுத் தர வேண்டியது உன் பொறுப்புதான்னு சொன்னாள்.
சுடலை மோசம் பண்ணுன காளிப்புலையனைக் கருவறுக்கணும்ங்கற வைராக்கியத்தோட நேரே மலையாள கரைக்கு வந்தவர் அங்க ஒரமா உள்ள ஒரு சுடுகாட்டுல போய் இருந்துகிட்டார் பொழுது விடிஞ்சதும் பிச்சைக்காரன் ரூபத்துல காளைப்புலையன் வீட்டுக்குப் போனார்.
அவனுக்கு ஒரு அழகான் ஒரு மகள் இருந்தாள் அவள் பேரு சூரி சுடலை முதல்ல அவளைக் கருவறுக்கணும்னு நினைச்சார்.
காளிப்புலையன் வீட்டு வாசல்ல கிழட்டுப் பிச்சைக்காரன் ரூபத்துல நின்னுகிட்டு அம்மா தாயே பிச்சை போடுங்கன்னு குரல் கொடுத்தார்.
சூரி வீட்டுக்குள்ள இருந்துகிட்டு தோழிப் பெண் ஒருத்தியிடம் பிச்சைப் பொருளை கொடுத்து அனுப்பினான்.
உடனே சுடலை நீ வீட்டுக்குள்ளே போ போயி இந்த வீட்டுக்கு உடமைப்பட்டவளக் கொண்டு வந்து பிசைப் பொருளை கொடுக்கச்சொல் என்றார் அதிகார தோரணையில்.
தோழிப்பெண் நேரே சூரியிடம் போய் தெருவில் நிற்கும் பிச்சைக்கார பெரியவர் சொன்னதை அப்படியே ஒப்பித்தாள்.
காளிப்புலையன் மகளும் அப்பேர்பட்ட கொம்பனைத்தானும் பார்க்க நினைச்சான் அதனால பிச்சைப் பொருளோட வீட்டு தலை வாசலுக்கு வந்தாள் வந்தவள் கிழட்டு பிச்சைக்காரனை ஏளனத்துடன் பார்த்து ஏய் பிச்சைக்கார கிழவா உமக்கா இம்புட்டு துமிர் மரியாதையா நான் தார பிச்சைப் பொருளை வாங்கிட்டு ஊர் போய் சேரும் எங்கப்பன் காளிப்புலையன் சேதி தெரியாம அலையா தீரும் னாள்.
சுடலை விடுவார அடியே காளிப்புலையனின் மகளே இன்னிக்கு ராத்திரி நடுச்சாமம் உன் அப்பங்காரன் வீட்டுல இருக்கும்போதே உன்னைப் பெண்டாளப் போறேன் முடிஞ்சா காப்பாத்திக்கபாரும் உங்கப்பனிடம் இதைச் சொல்லு எனக்கு நீதான் வேணும் உன் பிச்சைப் பொருள் வேண்டாம்ன்னார்.
சுடலை சொன்னதைக் கேட்டு சூரி அப்படியே ஆடிப்போயிட்டாள் வேர்த்துக் கொட்டியது தலை சுத்தியது பயந்து வீட்டுகுள்ள போய் தலைவாசல் கதவை அடச்சிகிட்டா.
ராத்திரி வெகு நேரத்துக்குபிறகு காளிப்புலையன் வீட்டில் இருக்கும்போதே சுடலை பாம்பு ரூபம் எடுத்து அவன் வீட்டுக்குள் போய் சூரியைக் கூடினார்.
அன்னைக்கே அவள் கருக்கொண்டாள் நாளாக நாளாக உடம்பில் தாய்மைக்குறிய அறிகுறிகள் தோன்றின தான் எப்படி கருத்தரிச்சோம்கிற சேதி தெரியல.
சுடலை காட்டு பன்னி ரூபம் எடுத்து காளிப்புலையனுக்கு சொந்தமான வாழத் தொப்புகளை எல்லாம் அழிச்சி துவம்சம் பண்ணினார்.
இது சுடலையின் வேலைதான்னு தெரிஞ்சுகிட்டு நேரே சுடலை இருக்குற சுடுக்காட்டுக்கு போனான் காளிப்புலையன்
சுடலை காளிப்புலையனைப் பார்த்து ஒரு கிடாரம் பொன்னுக்கு ஆசைப்பட்டு தானே கொட்டாரக்கரை பகவதி அம்மன் கோயிலுக்கு வந்தே நான் உனக்கு பத்து கிடாரம் பொன் இருக்கிற இடத்தைக் காட்டுதேன் உன்னால நான் சொல்கிற படி ஊட்டு(மாமிசப்படையல்)கொடுக்க முடியுமான்னு கேட்டார்.
பேராசை பிடிச்ச காளிப்புலையன் நீர் சொல்கிறபடி ஊட்டுக்கொடுக்கேன் எனக்குப் பத்துக் கிடாரம் பொன் இருக்க இடத்தைக் காட்டும்னான்.
சுடலை பூதங்களை கால்களாக நட்டு ஏழு பரண்போடணும் அதுல வரிசையா ஆறு பரண்கள்ல சூல் ஆட்டையும் சூல் மாட்டையும் சூல் பன்றியையும் சூல் குதிரையும் சூல் முதலையும் சூல் யானையையும் ஏழாம் பரண்ல கலயாணம் முடியாமல் கருக்கொண்ட கன்னிப் பெண் ஒருத்தியோட நெஞ்சைக் கீறி ஊட்டாக் கொடுக்கணும்னு கேட்டார்.
காளிப்புலையன் ஒப்புக்கொண்டான்
மறுவாரம் வெள்ளிக்கிழமை கால்களாக நடு ராத்திரி நேரத்துல ஆறு பரண்களை அமைச்ச பிறகுதான் தெரிஞ்சது ஏழாவது பரணுக்கு ஆள் இல்லைன்னு தன் மகள் சூரி பத்தி சிந்தித்தான்.
நம் இடத்துக்கே எவனோ ஒரு வில்ல வந்து நம்ம பிள்ளையே கர்பபமாக்கியிருக்கானே அவன் யாரா இருக்கம்னு ஒரு கணம் யோசிச்சாலும் பத்து கிடாரம் பொண்ணுக்கு ஆசை பட்ட பேராசை பிடிச்ச காளிப்புலையன் தான் பெத்த பிள்ளையையே கூட்டிட்டு வந்து ஏழாவது பரண்ல ஏத்தி அவள் நெஞ்சைக் கீறி சுடலைக்கு ஊட்டாகக் கொடுத்தான்.
பார்த்தார் சுடலை இனியும் இந்த படுபாவி பயலை இந்தப் பூலோகத்தில் வச்சிருக்கப்படாதுன்னு நினைச்சி அவன் சிரசைக் கிள்ளி எறிஞ்சார் இப்படியாக காளிப்புலையனோட மகளும் செத்தாள் காளிப்புலையனும் செத்தான் அதன் பிறகு பொன் உள்ள கிடாரத்து காவல் இருக்கும் பூதங்களை ஆரக்கட்டிட்டு சுடலை ஒரு கிடாரம் பொன்னையும் ஒரே பொதியாக கட்டி மாயக்குதிரை மேலே ஏத்தி கொட்டாரக்கரை பகவதி அம்மன் கோயில்ல கிடாரம் இருந்த இடத்துலேயே திரும்பவும் ஒரு கிடாரம் பொன்னையும் கொண்டாந்து வச்சார்.
.சுடலையின் திறமையைப் பாராட்டிய பகவதி அம்மன் திரும்பவும் சுடலையையே அந்தக் கிடாரத்துக்கு காவலரா நியமிச்சா இன்னைக்கும் பகவதி அம்மன் கோட்டைக்கு சுடலை காவலா இருக்காரு இதுதான் கொட்டாரக்கரை கடலையோட வரலாறுன்னு சுடலையின் கதையைச் சொன்னார் பூவாங்குளம் என்ற ஊரைச் சேர்ந்த கோயில் பூசாரி பரமசிவன்

குறுஞ்சாமிகளின் கதைகள்-1

ஊமையன் கோயில்

சாமிக்குக் கோயில் இருக்குது அரசனுக்குக் கோயில் இருக்குது மாட்டுக்காக உயிருவிட்ட மனுசன் ஒருத்தனுக்கு கோயில் இருக்குது உங்களுக்குத் தெரியுமா?சின்னக்கோவிலாங்கெளம்னு ஒரு ஊரு இந்த ஊருல மாடு,கன்னு இல்லாத வீடே இல்லைன்னு சொல்லலாம் ஊர்ல பெரும்பாதிப் பேரு வெவசாயம் பாக்குததால மாடு கன்ன மேய்க்க ஒருத்தர நெயமிச்சுருவாங்க இங்க மாடு மேய்ச்சிகிட்டு இருந்த கருப்பங்கர கெழவன் மண்டையப் போட்டுட்டாரு
அந்த நேரத்துல அந்த ஊருக்கு ஒரு ஊமையன் வந்தான்
ரொம்பக் கெழவனாவும் இல்லாம ரொம்ப எளந்தாரியாவும் இல்லாம நடுவாந்தமா இருந்தான் ஊர் மடத்துல படுத்துக் கெடந்திருந்தவனை எழுப்பி நீ யாரு? ஒம் பேரு என்ன?ஓம் வண்ணம்(ஜாதி)என்னன்னு கேட்டாரு ஒரு பெரியவரு அவன் பேபேன்னு என்னவெல்லாமோ சொன்னான் யாருக்குப் புரிஞ்சுது?ஊமையன் பாஷை உடையாளுக்குத்தான் (தாய்க்குத்தான்)தெரியுங்கிறது சொலவாம் அன்னையப் பொழுதுக்கு அந்தப் பெரியவரு அவனத் தன்னோட கூட்டீட்டுப் போயி வயிறாரச் சோறுப்போட்டுத் தங்க வைச்சாரு.

விடிஞ்சோன பெரியவரு ஊமையங்கிட்ட இன்னிக்கு எம் மாடு கன்னுகள மேய்ச்சலுக்குப் பாத்திக்கிட்டு போறயான்னு சைகையாலேயே கேட்டாரு ஊமையனும் சரின்னு சைகையாலேயே பதில் சொன்னான் ஏதோ வானத்திலிருந்து குதிச்சு வந்தவன் மாதிரி அந்த ஊருக்கு வந்த ஒரு வீட்டு மாடு கன்ன மேச்சவன் நாளானதும் ஊர் மாடு கன்னு பூரா மேய்க்க ஆரமித்தான்.

மாடு மேய்க்கும் போது எல்லாரும் மாடு பத்த ஏதாச்சும் கம்பு வச்சிருப்பாரு ஆனா ஊமையன் சீங்கொழல(புல்லாங்குழல்)எப்பவும் இடுப்புல சொருகி வைச்சிருப்பான் அந்த சீங்கொழலுதான் அவஞ்சொத்து
காலைலே வெயிலு வந்தோன மாடுகள மேய்ச்சலுக்கு ஒவ்வொரு தொழுவாமா அவுத்து வுடுவான அந்த காலத்துல மாடுக எல்லாம் ஒண்ணாக் கூட மாட்டு மந்தை இருக்கும் எல்லா மாடுகளும் அங்கதான் கூடும் அப்புறம் அதுக எல்லாத்தையும் பத்திக்கிட்டுக் காட்டுக்கு போவான் ஊமையன்.உச்சிப் பொழுதானதும் கொளக்கரைப் புளிய மரத்தடியில் ஒக்காந்து சீங்குழல எடுத்து ஒரு ராகத்த வாசிப்பான் மேஞ்சிக்கிட்டிருந்த எல்லா மாடுகளும் தன்னால மரத்தடியில கூடியிரும் வெயிலு தாழற வரைக்கும் மாடுக மரத்தடியில படுத்து அசை வெட்டும்(அசை போடும்)அப்புறம் கொளத்துக்குள்ள போயி வெயிலுக்கு எதமா மாடுக குளிக்கும் சாயந்தரமானா திரும்பியும் மேய்ச்சலுக்குப் போகுங்க

கருக்கலானதும் ஊமையன் சீங் கொழல எடுத்து இன்னொரு ராகம் வாசிப்பான மேய்ச்சலுக்குப் போன எல்லா மாடுகளும் புளிய மரத்தடியில ஒன்னாக் கூடுங்க பொழுது மசங்கின ஒடனே மாடுகளப் பத்திக்கிட்டு மந்தைக்கு வருவான் பழகுன மாடுக தானா அதுக வீட்டுக்கு போயிரும் புது மாடுகளை விட்டுக்காரங்களே வந்து பத்திக்கிட்டுப் போயிருவாக.
இப்படி மாடு மேய்ச்சிக்கிட்டிருந்த சமயம் ஒரு நா உச்சிப் பொழுதுல மாடுகள தவிப்பார போட்டுட்டு லேசாகக் கண்ண மூடிட்டான் அப்ப உளுந்து வறுத்தா ஒரு வாசம் வருமே அப்படி ஒரு வாசன ஊமையன் மூக்குத் தொலைக்குது ஊமையன் கண்ணத் தெறந்து பாக்குறான் ஒரு பெரிய நல்ல பாம்பு படமெடுத்து ஒரு மாட்டக் கொத்தறத்துக்குத் தயாரா நிக்குது
அத பாத்தோன ஊமையனுக்கு வெடவெடன்னு வந்திருச்சு ஒடிப்போயி அப்படியே அந்த பாம்போட கழுத்த கெட்டியாப் புடிச்சிட்டான் நல்ல பாம்பு சும்மா விடுமா?மாட்டக் கொத்த வந்த பாம்பு ஊமையனைக் கொத்திருச்சி கொத்துன நொடியிலே ஒடம்புல வெஷம் பரவிடுத்து வெஷம் பரவுனாலும் ஊமையன் தன்னோட புடியை விடல கையில இறுக்கிப் புடிச்சதுனாலேயே பாம்பும் செத்துப் போயிருச்சி ஊமையனும் அப்படியே மரத்தடியிலேயே செத்துப்போயிட்டான்

இதையெல்லாம் பாத்துக்கிட்டு இருந்த மாடுக கண்ணீர் வடிச்சதுக எந்த மாடும் கொளத்துக்குப்போய் தண்ணிக்குடிக்கல சாயந்தர மேச்சலுக்கும் போகல சீங்கொழலு சத்தங்கேக்காதனால மாடுக அப்பிடியே படுத்தது படுத்தபடியே கிடந்தது
பொழுது மசுங்குன பொறவும் மாடுக மந்தைக்கு வராததால ஊர் மக்க எல்லாரும் கையில தீப்பந்தத்தோட ஊமையனையும் மாடுகளையும் தேடி புளிய மரத்தடுக்கு வந்தாங்க

மரத்தடியில ஊமையன் வாயில நொரத் தள்ளி கையில நல்ல பாம்போட கெடக்க மாடுக கண்ணுல தண்ணியோட கெடக்க அதப் பார்த்த ஊர்சனம் பூராவும் அலுவசப்பட்டு (அதிசயப்பட்டு)அப்பிடியே மூக்கு மேல விரல வைச்சாங்க
எங்கிருந்தோ வந்த ஊமையன் ஊர் மாடுகள காப்பாத்த தன்னோட உசிரையே கொடுத்தானே அவன் தெய்வாம்சமானவன்னு சொல்லிப் புளிய மரத்தடியில அவன அடக்கம் பண்ணி அடையாளத்துக்கு ஒரு கல்லையும் நட்டு வச்சாக இன்னிக்கும் சுத்து வட்டாரத்துல மாடு கன்னுகளுக்கு சொகமில்லைன்னா ஊமையப்பா உன் சன்னதியில காள மாடு வாகனம் செஞ்சு வைக்கிறேன் மாட்டைக் குணப்படுத்திக் கொடுப்பா வேண்டிக்கிறாங்க சுகமயிட்டா உடனே வேண்டுனபடியே கல்லால செஞ்ச உருவத்தக் கொண்டு வந்து ஊமையங் கோயில்ல வைக்கிறாங்க

இன்னிக்கு அந்தச் சன்னதியில் நட்டிருந்த கல்ல எடுத்துகிட்டு ஊமையனுக்கு செல வச்சிருக்காங்க இப்போ ஊமையப் பரு செலயச் சுத்தி சின்னக் கோயிலக் கட்டியிருக்காங்கன்னு ஊமையப்பன் கோயிலு கதையைச் சொல்றாரு சூரங்குடி மாடசாமி.

ம‌றைவாய் சொன்ன‌ க‌தைகள்-14

ஒரு சேதி சொல்லு ராசா.

எங்க ஊரு பக்கம் ஒரு பழக்கம். ஒரு பழக்கமில்ல ஓராயிரம் பழக்கம். எங்க ஊருல மட்டுமில்லாம உலகம் பூரா அங்கங்க ஆயிரமாயிரம் பழக்கம்.அதுல ஒண்ணு கதை சொல்லுறது. பாட்டி வடை சுட்ட கதை, காக்கா தண்ணி குடிச்ச கதையெல்லாம் எழவு எவனுக்கு வேணும்?

'அப்படி'ப்பட்ட கதையெல்லாம் கேட்டு இருக்கீங்களா? என்ர வயசுப் பசங்களக் கேட்டுப்பாருங்க. கதையே சொல்லத்தெரியாது, இந்த லட்சணத்துல வெவகாரமா ஒண்ணச் சொல்லி அத மொகஞ் சுளிக்காத மாதிரி சொல்லத் தெரியுமா?

எங்க தாத்தன் பொழப்பு கெட்ட நேரமெல்லாம் யோசிச்ச கதைக, அவஞ்சோட்டு ஆளுங்க அமுக்கமாப் பேசுன கதைக எல்லாஞ் செத்துப் போச்சா?
*****
"ம‌றைவாய் சொன்ன‌ க‌தைகள்". ந‌ம்ம கி.ராவும், க‌ழ‌னியூர‌னும் கேட்ட‌ க‌தைக‌, சுத்தி சுத்தி சேர்த்த‌ க‌தைக.

நூறுக‌தைக. அத்த‌னையும் வெவ‌கார‌மான‌ க‌தைக‌,சுளுவாவும் இருக்குது, சொகமாவும் இருக்குது.

நூறு க‌தைக‌ளும் அம்ச‌மா இருக்குதான்னு கேட்டா இல்லைன்னுதான் சொல்ல‌ணும். அம்ப‌த‌றுப‌து க‌தைக‌ அட்ட‌காச‌ம், இருவ‌து க‌தை ந‌ல்லா இருக்குது. மீதிக் க‌தைக‌ த‌ப்பிப் போச்சு.

ஒரு க‌தைய சுருக்க‌மாச் சொல்லுட்டா?
ஒரு ராசாகிட்ட‌ ஒரு வேல‌க்கார‌ன், அச‌ப்புல‌ ராசா மாதிரியே இருக்கான். எல்லோருக்கும் ஆச்ச‌ரிய‌ம‌னா ஆச்ச‌ரிய‌ம். ராசாவுக்கு ஒரு ச‌ந்தேக‌ம், ந‌ம்ம‌ அப்ப‌ன் தான் ஏதோ வெவகார‌ம் பண்ணி இருக்கான்னுட்டு. வேலக்காரன‌ கூப்புட்டு வில்ல‌ங்க‌மா சிரிச்சுட்டு கேட்டாரு. உங்க‌ ஆத்தா இங்க‌ வேலை செஞ்சாளான்னு, வேல‌க்கார‌ன் சொன்னாமா, "இல்ல‌ ராசா. எங்க‌ப்பன் தான் அர‌ண்ம‌னைல வேல‌ செஞ்சான்"ன்னு. புரியுதா சேதி?

இப்ப‌டித்தான் பாத்துக்குங்க‌. சில‌ க‌தைக ம‌ற‌ச்சு ம‌ற‌ச்சு பேசுனா, சில‌ க‌தைக ப‌ச்சையா பேசுது. உங்க‌ தாத்த‌னும்,என்ர‌ தாத்த‌னும் லேசுப்ப‌ட்ட‌வ‌னுக‌ இல்ல‌. அது ம‌ட்டும் தெளிவா தெரியுது. பாட்டிக‌ளையும் சேத்துக்குங்க‌.
*********
இல‌க்கிய‌ப்பூர்வ‌மாக‌வோ அல்ல‌து வ‌ர‌லாற்றுப் பார்வையிலோ நோக்கும் போது, இந்த‌ப் புத்த‌க‌த்தின் தொகுப்பாளர்க‌ளிருவ‌ரும் செய்த காரியம் மிக முக்கியமானது. இத்த‌கைய‌ அழிவின் விளிம்பு நிலை இல‌க்கிய‌க் கூறுக‌ளை ஆவ‌ண‌ப்ப‌டுத்தியிருப்பது பாராட்டுக்குரிய‌து. சிறப்பாக வடிவமைத்திருக்கும் உயிர்மை ப‌திப்ப‌க‌த்திற்கும் வாழ்த்துக்க‌ள்.

க‌தைக‌ளைச் சொல்லிவிடுவ‌தோடு ம‌ட்டுமில்லாம‌ல், அந்த‌க் க‌தையினை சொல்லும் போக்கிலேயே, அந்த‌க் கால‌க‌ட்ட‌ம், வாழ்விய‌ல் முறைக‌ள், பெண்க‌ளின் நிலை போன்ற‌வ‌ற்றை சொல்லிச் செல்கிறார்க‌ள்.

இத்த‌கைய க‌தைகள் ச‌மூக‌த்தில் அங்குமிங்குமாக‌ உல‌வி வ‌ந்த‌ போதிலும், எழுத்து வ‌டிவ‌மாக‌ ஆவ‌ண‌ப்ப‌டுத்தி முன் வைக்க‌ தைரிய‌மும், க‌தையின் அச‌ல் த‌ன்மை மாறாம‌ல் ம‌றுவ‌டிவாக்க‌ம் செய்ய‌ திற‌மையும் அவ‌சிய‌ம்.
அனுப‌வ‌ப்ப‌ட்ட‌ எழுத்தாள‌ர்களான கி.ராவும், கழனியூரனும் இந்த‌ இர‌ண்டு அம்ச‌த்திலும் எந்த‌க் குறையும் வைக்க‌வில்லை.
******
பாலிய‌ல் க‌தைகள் நாட்டுப்புற பாலியல் கதைகள் ம‌ற்ற‌ எந்த‌ இல‌க்கிய‌க‌ வ‌கைக்கும் எந்த‌ வித‌த்திலும் குறைந்த‌வைய‌ல்ல‌ என்ப‌த‌னை மீண்டும் ஒரு முறை அழுத்த‌மாக‌ப் புரிந்து கொள்கிறேன்.

மறைவாய் சொன்ன கதைகள் -13

திருநெல்வேலி மாவட்டத்தில், தென்காசிக்கு அருகில் இருக்கும் கழுநீர்க்குளம் என்னும் ஊரில் பிறந்தவர் கழனியூரன். ஆசிரியராகப் பணியாற்றிக்கொண்டிருக்கிறார். கி.ரா வைப் பற்றி பெரும்பாலான தமிழ்வாசகர்களுக்குத் தெரிந்திருக்கும்.



திருநெல்வேலி மாவட்டத்தில், தென்காசிக்கு அருகில் இருக்கும் கழுநீர்க்குளம் என்னும் ஊரில் பிறந்தவர் கழனியூரன். ஆசிரியராகப் பணியாற்றிக்கொண்டிருக்கிறார். கி.ரா வைப் பற்றி பெரும்பாலான தமிழ்வாசகர்களுக்குத் தெரிந்திருக்கும்.


இனி புத்தகத்தைப்பற்றி,

100 நாட்டுப்புறப் பாலியல் கதைகளைக் கொண்ட ஒரு தொகுப்பு இது! இதில் இடம்பெற்றுள்ள கதைகள், 'வயது வந்தவர்களுக்கு மட்டும்'(1992, நீலக்குயில் பதிப்பகம், கி.ரா), 'நாட்டுப்புறப் பாலியல் கதைகள்' (1994, நீலக்குயில் பதிப்பகம், கழனியூரன்) ஆகிய புத்தகங்களிலிருந்தும், 'இறக்கை' மற்றும் 'வாசுகி' இதழ்களில் கழனியூரன் எழுதிய பாலியல் கதைகளில் இருந்தும் தொகுக்கப்பட்டவை.

இதுவரை பெரும்பாலும் செவி வழியாகவே அறியப்பட்டு வந்த நாட்டுப்புறப் பாலியல் கதைகள் எழுத்து வடிவம் பெற்றிருக்கின்றன. பாலியல் தெளிவு எற்படுத்தும் கதைகள், நகைச்சுவைக்காவே புனையப்பட்ட கதைகள், மருவிய கதைகள், உண்மைச்சம்பவங்கள் எனப் பல பரிமாணங்களில் இக்கதைகள் எழுதப்பட்டுள்ளன.

சில கதைகள் நாம் ஏற்கனவே அறிந்தவையாகவும் இருக்கின்றன. இன்றும் கூட பாலியல் விஷயங்களை நமக்கு முதன்முதலில் அறிமுகம் செய்பவை இது போன்ற பாலியல் கதைகள் என்றுதான் சொல்ல வேண்டும். இது போன்ற கதைகளும், கதை சொல்லிகளும் எல்லா கிராமங்களிலும் பரவிக்கிடக்கின்றனர்.('அர்' விகுதி இந்த இடத்திற்குச் சரியானதா?)

இப்புத்தகத்தில் இடம்பெற்றிருக்கும் பெரும்பாலான கதைகள் தாத்தா என்கிற 'தாத்தா நாயக்கர்' என்ற கதைசொல்லி சொல்வதாகவே அமைந்திருக்கின்றன. அவர் மூலமாக பல பொதுவான கருத்துக்களையும் முன்வைக்கிறார் ஆசிரியர். 'கெட்ட வார்த்த கத கேக்கிறவன் கெட்டு பொயிடுவான்னு ஒன்னும் கிடையாது. விஷயம் தெரிஞ்சவன் அவ்வளவு சீக்கிரம் கெட்டுப் பொயிட மாட்டான்' என்பது தாத்தாவின் வாதமாக இருக்கிறது.

அடிமனக்கூறுகளில் ஆக்ரமித்திருக்கும் அதீதமான பாலியல் கற்பனைகள், சில கதைகளாக உருவெடுத்திருக்கின்றன. மனித உறவுமுறைகள் ஒழுங்கு படுத்தப்படாத காலத்தில் புனையப்பட்ட கதைகள் சிலவும் இடம்பெற்றிருக்கின்றன. 'அபூர்வ ராகங்களை' நினைவுபடுத்தும் ஒரு கதை, வெற்றிலை வந்த கதை, கடல் தொன்றியதற்கான கதை, ஆணுக்குப் பிரசவ வலி வேண்டிய பெண்கள் கதை என சில கதைகள் வேறு வடிவத்தில் நம்மை ஏற்கனவே வந்தடைந்தவையாக இருக்கின்றன.

கன்னியாகுமரி மாவட்டப் பகுதிகளில் சிலவற்றில், ஒரு குறிப்பிட்ட இனத்தைச் சேர்ந்த பெண்கள் மேல் சேலை அணியக்கூடாது என்ற கட்டுப்பாடு 19ஆம் நூற்றாண்டின் இறுதி வரை இருந்திருக்கிறது. அன்று நிகழ்ந்த ஓர் உண்மைச்சம்பவமும் இங்கே கதையாகக் கொடுக்கப்பட்டிருக்கிறது. தங்கள் பகுதியை ஆளும் ராஜாவை வரவேற்கும் கூட்டத்தில், ஒரு பெண் தன் பிறப்புறுப்பைக் காட்டி வரவேற்கிறாள். அதற்கு அவள் தரும் விளக்கம் மக்கள் மத்தியில் ஒரு மாற்றத்தை ஏற்படுத்துகிறது. ராஜாவும் மனம் மாறி அவர்கள் விருப்பப்பட்டால் மேலாடை அணியலாம் எனச் சலுகை அளிக்கிறார். இதன் தொடர்ச்சியாகவே அந்தப் பகுதிகள் முழுவதும் 'தோள் சீலைப் போராட்டம்' நடத்தப்பட்டிருக்கலாம்.

மொத்தத்தில் இது பாலியல் உணர்ச்சிகளைத் தூண்டும் நோக்கத்தோடு வெளியிடப்பட்ட புத்தகம் இல்லை. கொஞ்சம் தெளிவு, பழையன தேடும் ஓர் ஆர்வம், கதை சொல்வதின், கேட்பதின் சுகம், கிராமத்து பழக்கங்கள் இவற்றைப் பெறுவது என்கிற அடிப்படியிலேயே இக்கதைகளைத் தொகுத்து வெளியிட்டிருக்கிறார்கள் கி.ராவும் கழனியூரனும். தொகுக்கும்போது நிகழ்ந்த சுவாரஸ்யமான நிகழ்ச்சிகளையும், ஏற்பட்ட சங்கடங்களையும், எதிர்ப்புகளயும் பின் இணைப்பில் விளக்கி இருக்கிறார் கழனியூரன்.

சில பின் குறிப்புகள்:

1. அழகான கிராமிய நடை, புத்தகம் முழுவதும் கையாளப்பட்டிருக்கிறது
2. இந்தப் புத்தகத்தின் எந்தவொரு இடத்திலும், வழக்கத்தில் இருக்கும் 'கெட்ட' வார்த்தைகள் பயன்படுத்தப்படவில்லை.
3. தமிழின் கெட்ட வார்த்தைகளையும், அவற்றின் ஆதி, வழங்குமுறை இவற்றைத் தொகுத்து வெளியிடுவதே தன் அடுத்தத் திட்டம் எனக் குறிப்பிட்டிருக்கிறார் கி.ரா.

சொலவடைகளும் பழமொழிகளும் -6

சில சொலவடைகளுக்கு விளக்கம் சொல்ல ஒரு கதையையே சொல்ல வேண்டிய திருக்கும். இன்னும் சில சொலவடைகளுக்கு விளக்கம் சொல்ல சில காட்சிகளை விளக்க வேண்டியதிருக்கும். பல சொலவடைகளுக்கு வாழ்வியல் எதார்த்தம் சார்ந்து பொருள் சொல்ல வேண்டியதிருக்கும்.


 இந்த வாரம் காட்சி விளக்கம் சொலவடைகளை மட்டும் பார்ப்போம். ஓரு ஊர்ல ஒருத்தி இருந்தாள். அவளை அசலூர்ல கட்டிக் கொடுத்திருந்திச்சி. அவள் புருஷன் சம்சாரித்தனம்தான் (விவசாயம்) பார்த்தான். ஆள் பார்க்க வாட்டசாட்டமா, ஆஜானுபாகனா இருப்பான். அவளோ, ஒல்லியாய் பூங்கொடி போல இருப்பாள். ரெண்டு பேரையும் ஜோடியாய்ப் பார்ப்பவர்கள் அவளைப் பார்த்து ‘ஐயா பாவம்Ó என்பார்கள்.

 ‘எப்படா ஒடிஞ்சி விழுமோம்னு அவள் இருக்காள். இடும்பன்தடி’ மாதிரி அவன் இருக்கான். பாவம் அந்தப் புள்ளை அவளை வச்சி எப்படிச் சமாளிப்பாள்?Ó என்று அனுதாபப்பட்டார்கள்.

 பார்க்க ஆள் பயில்வான் மாதிரி இருப்பதால் பொண்டாட்டிக்காரி புருசன் கிட்ட வந்தாலே பயந்தாள். பயந்து என்ன செய்ய. ராத்திரி நேரத்தில் ‘கிட்ட வராதே’ என்றா தொட்டுத் தாலி கட்டுன புருஷனைப் பார்த்துச் சொல்ல முடியும்? எப்படியோ ‘பல்லைக் கடி நெல்லைக் கடி’ன்னு காலத்தையும் நேரத்தையும் ஓட்டுனாள். அவள் புருசக்காரனுக்குக் ‘கோழிக்காமம்’ கொஞ்ச நேரத்திற்கு ஒரு தடவை பெண்டாட்டிக்கிட்ட ‘பேசிப்பெரக்கி’ இருக்கனும்னு  ஆசைப்படுவது அவன் இயல்பாக இருந்தது. அவளோ காமம் என்றாலே காத தூரம் ஓடினாள்.

 ‘கட்டுன புருசனின் இடைஞ்சலில் இருந்து நாலு நாள் விடுதலையாகி இருப்போமே’ என்று நினைத்துக் கொண்டு பக்கத்தூரில் இருக்கும் தன் அக்காளின் வீட்டிற்குப் புருசனிடம் சொல்லிக் கொண்டு கிளம்பினாள்.

 அந்தக் காலத்தில் கார் ஏது, ரெயில் ஏது நடந்தேதான் போனாள். அக்காக்காரியின் வீடு போய்ச் சேரவே அந்திக் கருக்கல் நேரமாயிட்டு. அக்காவும் மச்சானும் காடுகரையில இருந்து அப்பதான் வீட்டுக்கு மாடு, கன்றுகளோடு வந்து சேர்ந்திருந்தார்கள்.

 தங்கச்சிக்காரியைக் கண்டதும், அக்காக்காரிக்கு ரொம்ப சந்தோஷம். தங்கச்சிக்காரியை ஆப்புச் சேர்த்துக் கட்டிப் (ஆரத்தழுவி) பிடிச்சுக்கிட்டு, அங்க எப்படி கொளுந்தன் உன்னை நல்லா கவனிச்சிக்கிடுதாகளா? சோறு தண்ணிக்கு மயக்கமில்லையே’ என்று குசலம் விசாரித்தாள்.தங்கச்சிக்காரி முகம் வாடி இருப்பதைப் பார்த்து, அவளுக்குப் பிடித்தமான கோழிக்குளம்பு வைத்தாள். எல்லாரும் சாப்பிட்டுவிட்டு அவரவர் இடத்திற்குப் படுக்கப் போனார்கள்.

 இங்கே அக்காக்காரியின் கதையும் அதுவாகத்தானிருந்தது. ‘புருசனுக்குப் பயந்து எங்கடா போய் ஒளிவோம்’ என்றுதான் நினைத்துக் கொண்டிருந்தாள். பாயில். தங்கச்சிக்காரியுடன் படுத்துக்கிடந்த அக்காக்காரியை அவள் புருசன் நடுச்சாமம் போல ‘அந்தக்’ காரியத்திற்காகத் தட்டி எழுப்பினான். தங்கச்சிக்கும்  முழிப்புத் தட்டிட்டு அக்காக்காரி இன்னக்கி என்னால முடியாது என்று சொல்லிவிட்டுத் தங்கச்சிக்காரியைப் பார்த்து கண்ணைக் காட்டினாளாம். இந்தச் சூழலின் பின்புலத்தில் ‘அங்க சடச்சி, அக்கா வூட்டுக்குப் போனாளாம். அக்கா தூக்கி மச்சாங்கிட்டப் போட்டாளாம்’ என்ற சொலவடையைச் சொல்லிப் பாருங்கள். அதன் பொருள் பூரணமாகப் புரியும்.

 இதேபோல காட்சிப்படுத்தப்பட்ட இன்னொரு சொலவடை. அங்கனம் (நடத்தை) கெட்ட கழுதை. ஆத்துக்குப் போச்சாம். அங்க ரெண்டு கழுதை மறைவுக்கு வான்னுச்சாம்’ என்பது.

 இங்க ‘கழுதை’ என்பது பெண்ணைக் குறிக்கிறது. நடத்தை கெட்ட பெண்ணை நடத்தை கெட்ட ஆண் மிக எளிதில் அடையாளம் கண்டு கொள்வான். எங்கு சென்றாலும் அவர்களுக்குள் எளிதில் தொடர்பு ஏற்பட்டு விடும். ஏதோ ஒரு அலைவரிசையில் அவர்களின் புலன்கள் பேசாமல் பேசிக்கொள்கின்றன.

 நடத்தை கெட்டவளின் நடை, உடை, பாவனை, பேச்சு லாயக்கு முதலியவை ‘அவள் அப்படித்தான்’ என்று ஆண்களுக்குக் காட்டிக் கொடுத்து விடுகிறது. எனவே மிக இயல்பாக இடத்தை கெட்ட பெண்ணை எளிதில் இனம் கண்டு மற்ற ஆண்கள் அவளை மறைவுக்கு வாரியா?’ என்று அழைக்கிறார்கள். இந்தச் சொலவமும் இதற்கு முந்திய சொலவமும் கிட்டத்தட்ட ஒரே சேதியைத்தான் பேசுகின்றன.

 ஒரு தாய்க்கு மூன்று பிள்ளைகள். மூன்றும் பொட்டப் பிள்ளைகள். தகப்பக்காரன் சின்ன வயசிலேயே இறந்துட்டான். மூத்தமகள் கெட்டிக் கொடுத்த இடத்தில் நில, புலன், வீடு வாசல் என்று வசதியாக இருந்தாள். அவளுக்கு ஆண் ஒன்று பெண் ஒன்று என்று பிள்ளைகளும் இருந்தன. அதே மாதிரி கடைக்குட்டிப் பிள்ளையும் கெட்டிக் கொடுத்த இடத்தில் வீடு, வாசல், சொத்து சுகம் என்று வசதியாக இருந்தாள். அவரிருக்கும் ரெண்டு பிள்ளைகள் பிறந்திருந்தன. ஆனால் நடுவுள்ளவளுக்கு மட்டும் அந்த அதிர்ஷ்டம் இல்லை. அவள் புருசனும் சின்ன வயசிலேயே இறந்துட்டான். வீடு என்ற பேருக்கு ஒரு குச்சில் மட்டும் இருந்தது. மற்றபடி அன்னாடம் வேலைக்குப் போனால்தான் சாப்பாடு என்ற நிலமை.

 தனக்கு மூத்த அக்காக்காரியும் தனக்கு இளைய தங்கச்சிக்காரியும் வாக்கப்பட்டுப் போன இடத்தில் வசதியாக இருக்க தன் நிலமை இப்படி ஆயிட்டே என்று நினைத்து அடிக்கடி வருத்தப்படுவாள். தன் தலைவிதியை எண்ணி நொந்து கொள்வாள். அவள் வயிற்றில் ஒரு புழுபூச்சியும் வைக்கவில்லை. பிள்ளைகள் நினைப்பு வரும் போதெல்லாம் அக்கா வீட்டுக்காவது அல்லது தங்கச்சி வீட்டுக்காவது போயிருவாள்.

 அக்கா வீட்டுக்குச் சட வார (ஓய்வெடுக்க) போனாலும், அவள்  சகோதரியின் நில¬யைப் புரிந்து கொள்ளாமல் அவளையும் தன்னோடு வேலை செய்ய காடுகரைக்கு கூட்டிக் கொண்டு போய்விடுவாள். அதே மாதிரிதான் தங்கச்சிக்காரியும் அக்காள் அலுத்துச் சடைச்சி நம் வீட்டுக்குச் ‘சட வார’ வந்திருக்காளே’ என்று நினைக்காமல் தன்னோடு வயக்காட்டிற்கு வேலை செய்ய அழைத்துச் செல்வாள்.

 பாவப்பட்ட நடுவுள்ளவளின் கஷ்டத்தை சகோதரிகள் இருவருமே புரிந்து கொள்வதில்லை. இப்படிப்பட்ட சூழலில் நடுவுள்ளவளின் வாய்மொழியாக,

 ‘அக்காட்டச் சலிச்சி தங்கச்சி வீட்டுக்குப் போனா அங்க அரைக்கோட்டை  விதப்பாட்டுக்கு களைவெட்டச் சொன்னாளாம் என்ற சொலவடை பிறக்கிறது. இப்போது வாசகர்கள் இந்தச் சொலவடை சொல்ல வரும் பொருளைப் புரிந்து       கொள்வீர்கள் என்று நம்புகிறேன்.

 ...........

 ஆசைக்கு அளவில்லை. எவ்வளவு பணம் சேர்ந்தாலும். பணத்தின் மீது உள்ள ஆசை மனிதனுக்கு அடங்குவதில்லை. ஆனால் சாப்பாட்டு விசயத்தில் மட்டும் ஒருகட்டத்தைத் தாண்டியதும் ‘போதும்’ என்று சொல்லி விடுகிறான். அதேபோலதான் தாகத்திற்குக் குடிக்கிற தண்ணீர் விசயத்திலும் தாகம் தீர்ந்தவுடன் ‘போதும்’ என்று தலையாட்டி விடுகிறான். மனிதன் பிறந்ததில் இருந்து இறக்கும் வரை உணவும்  நீரும் அவனுக்கு அத்தியாவசியமானதாக இருக்கிறது. வண்ணம் மாறலாம். வடிவம் மாறலாம். ருசியும் மாறலாம். ஆனால் உணவு, நீர் என்ற அடிப்படைத் தன்மை மாறாது. ‘அகிலத்தில் திகட்டாதது அன்னமும், நீரும்தான்’ என்கிறது ஒரு பழமொழி